БІЛІМ КҮНІНДЕ – ҰСТАЗДАРҒА ҚҰРМЕТ

Білім күніне арналған салтанатты жиында мектебіміз үшін ерекше әсерлі әрі тағылымды сәттердің бірі өтті. Мектеп директоры Ерболат Мажибаевич білім саласында ұзақ жылдар бойы аянбай еңбек етіп, ұрпақ тәрбиесіне өлшеусіз үлес қосқан ардагер ұстаздарымызға «Күршім ауданының зейнеткер ұстазы» төсбелгісін салтанатты түрде табыстады.

Бұл марапат – ұстаздық жолда табандылық танытып, саналы ғұмырын шәкірт тәрбиесіне арнаған, мектептің өсіп-өркендеуіне зор үлес қосқан ардақты ұстаздарға деген аудан жұртшылығының құрметі мен алғысының айқын белгісі. Ардагер ұстаздарымыздың еңбегі – жас ұрпақтың жарқын болашағына салынған берік іргетас.

Салтанатты жиында мектеп ұжымы мен оқушылар қауымы зейнеткер ұстаздарға шынайы ризашылықтарын білдіріп, жүрекжарды лебіздерін арнады. Ұстаздарымыздың даналығы мен тәжірибесі – бүгінгі жас мамандарға үлгі, ал олардың адал еңбегі – мектеп тарихының алтын парақтары.

Ұстаз – ұлттың тірегі, қоғамның шамшырағы.
Құрметті зейнеткер ұстаздарымызға мықты денсаулық, ұзақ ғұмыр, отбасыларына амандық пен береке тілейміз! Сіздердің ерен еңбектеріңіз бен шәкірт жүрегінде қалған іздеріңіз әрдайым биік бағалана береді.